又抽中iBond阿涂續長揸

【明報專訊】新一批100億元iBond今日發行，當年「成功爭取」政府發行iBond、話自己係「iBond之父」嘅民主黨涂謹申，同埋開證券行嘅金融服務界議員張華峯都抽到，但兩人都話唔會即刻放，等收息。阿涂話，連同之前兩次抽到嘅iBond，佢都會繼續長揸，唔會即日就放。


張華峯唔放等加息

張華峯雖貴為證券行老闆，但佢今次係首次親身抽iBond，同阿涂一樣抽到兩手，佢都話唔會即刻放，一來兩手只係好少錢，佢亦建議大家可以持貨耐啲，因為可預視未來應會加息，擺嚟收息都唔錯；二來如果持有iBond，將來要喺證券行買股票，用iBond做抵押，借貸比率亦唔低，隨時一手1萬蚊嘅iBond都可以借到八九千蚊。


不過，唔係所有議員都對iBond有興趣，本身係會計師嘅民建聯副主席李慧琼就無抽，佢唔係因為擔心行政會議身分有衝突，只係因為太忙，又覺得填表好麻煩，所以政府推出咁多次都無抽啫。