「鋒雲」論壇萬人撲飛

【明報專訊】嚟緊呢個禮拜日有個「鋒雲」論壇，負責主講嘅係搞電影後期製作賺大錢嘅謝霆鋒，同埋阿里巴巴創辦人馬雲；謝霆鋒仲諗住喺台上煮嘢食，煮唔煮得成仲未知，但就真係夠晒gimmick。原本1000個名額梗係唔夠，因為有成萬人登記要攞飛，最終搞到大會要轉場，由九展轉咗去亞博，攞唔到飛唔使失望，可以睇網上直播。


九展唔夠坐 轉場亞博

呢個印有「家是香港」嘜頭嘅「鋒雲」論壇，係由「伴你啟航青年創業資助計劃」搞嘅，召集人係霍震霆個仔霍啟剛，籌委會主席係理文造紙嘅李文斌。論壇其他講者有摩根大通嘅方方，同埋盛匯商機創辦人李根興，陳志雲做主持。


除咗論壇，呢個計劃遲啲仲會搞六大產業創業比賽，20至35歲嘅青年可以參加，贏咗會有30萬創業資助。霍啟剛笑住話自己確係未創過業，但係會搵專人教後生仔點做生意，搞論壇加埋比賽，最少要超過500萬經費。其實，個個搞手都係富貴人家，睇嚟佢哋要籌足錢找數應該不成問題啦！