彭清華酒會 董曾梁一齊入場

【明報專訊】噚日喺會展舉行廣西香港行聯誼酒會，前所未有咁齊人，政協副主席董建華、前特首曾蔭權、現任特首梁振英都喺度。更難得嘅係，三位一齊入場，夠晒畀面酒會主人家。邊個咁大面子？咪就係中聯辦前主任、家廣西壯族自治區黨委書記嘅彭清華囉！


雖然3位前任現任特首幾乎同一步伐入場，但祝酒時，CY同企喺隔籬嘅煲呔只係輕輕碰杯，但同老董碰杯就落力得多，明眼人一眼就睇到乜嘢叫「親疏有別」啦！

台下嘉賓都唔弱，除咗羅范椒芬、邵善波同紀文鳳等「梁粉」，上年特首選戰同CY爭崩頭，現貴為政協常委嘅唐英年，孖住林健鋒同林大輝等出席。唐唐雖然無份上台主禮，但心情睇嚟唔錯，四圍飛同人密密傾。


唐唐心情靚「四圍飛」

當唐唐走出會場時，Emily隨即問佢「點睇CY上任一年表現」，唐唐反應係即時笑笑口話「多謝你」，之後先再補多句「我家唔評論」，唔知笑住回應係乜嘢含意呢？