王維基派人「捐」最大地洞

【明報專訊】香港電視遲遲未攞到免費電視牌，但老闆王維基無停手，繼續叫攝製隊四出拍節目，最新搞作係去越南拍全世界最大地洞「韓松洞」，王維基話National Geographic都去過，但只係喺洞口拍，佢哋真係深入洞穴。攝製隊仲去到無人去過嘅分支地方，攞埋嗰度個命名權，但係改乜嘢名呢，就未諗到。


越南韓松洞過8日7夜

呢個節目叫《挑戰》，由藝人劉玉翠、艾威同周俊偉主持，佢哋喺個洞入面過咗8日7夜，先要游繩90米入洞底，入咗去之後又要爬上100米高嘅「Great Wall」鐘乳石，沿途危機四伏，劉玉翠真係拍到喊，大叫想返屋企，但噚日喺試映會見到成果，佢就話值得。


《挑戰》片段就快放上網，而已經上網嘅《警界線》點擊率已去到50萬，要啲手下去到盡嘅王維基話，暫時只畀啲節目65至70分，因為劇中警察夫婦嘅對白，竟然討論子彈來福線係獨一無二，呢啲明明係警察嘅常識，無理由要咁講。睇嚟香港電視嘅編劇，真係要戒一戒畫公仔畫出腸。