陳果出手 「梁震嬰」現身鬼片

【明報專訊】特首梁振英（CY）喺七一前大講自己一年政績，唔知導演陳果認唔認同呢？近日網上瘋傳陳果執導嘅新戲《迷離夜》內短篇故事《驚蟄》片段，飾演黑幫嘅盧海鵬去打小人，佢向負責打小人嘅阿婆（邵音音飾演）報上名來，話佢名叫「梁震嬰」，邵音音聽到後就大笑話「梁震嬰？」，盧海鵬即爆粗話﹕「唔好咁大聲啦，鬼叫個XX（粗言）同我同名同姓咩！」

要打小人 因有人阻上位

之後嘅對答，更加令人覺得陳大導有意玩CY。當盧海鵬解釋要打小人係因為「有人阻我上位」時，邵音音就講笑話﹕「好正常吖，你個名都叫梁震嬰咯，哈哈哈哈。」


邵音音又問，佢有冇同班兄弟講自己做咗龍頭，可以幫班兄弟搵錢，盧海鵬即刻引用CY名言話﹕「喺印象中，我冇。」唔少網民都話睇完呢段片忍唔住笑，周圍share，成為熱話，熱烈程度應該同市建局嘅「囍歡里」有得揮。