錢穆蔡元培墨寶展出

【明報專訊】由前荔枝角醫院建築群活化而成的饒宗頤文化館開幕無幾耐，最近又有新搞作。文化館花咗半年策劃咗一個墨跡大展，展示過去100年曾經旅港嘅39名學人嘅墨寶，包括著名教育家、北京大學前校長蔡元培嘅《行書七言聯》，國學大師錢穆嘅《八高僧圖跋》，仲有為唔少大專院校創作校歌嘅黃友棣，佢譜寫嘅珠海書院建校50周年頌歌原稿都會展出！


展百年旅港學人作品

有份籌劃呢個《承前啟後——近代旅港學人墨跡大展》嘅文化館管理委員會委員陳萬雄話，過去100年，大陸同香港有好多文人同思想家，由於內地政局變遷，香港喺唔同時期都成為內地學者文化人流寓聚居嘅地方，佢哋留低嘅真迹可以促進本港文化發展。


佢又話，20年前無乜人重視呢啲墨寶，但家內地有好多人會爭相拍賣，期望未來可以舉辦多兩三次同類展覽，畀公眾觀賞。


展覽會今日起至9月28日，逢周二、四、六，上午10點至下午6點免費開放，地址﹕青山道800號。