社民連貼海報「突襲」港鐵

【明報專訊】Emily噚日經過旺角港鐵站，見到車站大堂牆身黐咗好多寫住「港鐵加價 貪得無厭」嘅海報，仲用貼紙黐咗「收皮」兩個字喺地面，連閘機同垃圾桶都被人貼滿諷刺港鐵加價嘅貼紙。嘩，無理由港鐵自己鬧自己㗎？


抗議加價 職員發警告信

仔細睇先發現，原來啲海報係社民連為咗抗議港鐵加價而整，只不過扮港鐵海報似到十足，本身港鐵嘅標誌被改成「$」符號，港鐵原本句「一路帶動生活」被改為「一路帶動通脹」。路人見到，梗係影相再share上facebook啦。


港鐵早排宣布今個月30號起平均加價2.7%，《香港鐵路附例》寫明禁止喺港鐵站貼標語傳單喎，港鐵發言人就話理解有人想表達意見，但唔希望其他乘客受到滋擾，所以旺角站職員見有人未經允許就貼海報同貼紙，已經即場發咗警告信，仲話最高可罰款5000蚊同監禁3個月。