公民黨蛋與高牆短片招黨員

【明報專訊】雖然關心政治嘅市民愈嚟愈多，不過要人真係加入一個政黨都唔容易，公民黨為咗吸引更多人入黨，近日推出咗一條有關「雞蛋與高牆」嘅短片，講市民喺現時生活環境下，所有人都係雞蛋，無論你係社工、派報紙員等都一樣，呼籲大家七一要行出嚟對抗高牆之餘，亦希望市民加入公民黨。


除咗短片，公民黨亦推出物品喺七一遊行時售賣吸金，主席余若薇話今年七一天氣會好熱，佢哋賣毛巾就啱晒，等市民熱嘅時候都可以立即使用，毛巾一共有兩套，分別印上小紅帽樣同埋「忍無可忍」字眼供選擇。佢哋又會賣拖鞋，仲講笑話大家遊行到鵝頸橋時，就可以用拖鞋嚟打小人。


噚日記者會有唔少笑位，好似余若薇著咗條黑色裙，設計上有一個個窿，當佢打算講記者會內容時，坐喺旁邊嘅黨友毛孟靜突然問對方，「你件衫係咪see-through（透視）？」搞到余若薇都幾尷尬，唯有笑笑口叫對方尊重少少。