$5.5呎租工廈助藝術家

【明報專訊】藝術家有時會話冇錢租地方做嘢，藝發局噚日推出「ADC藝術空間計劃」，同協成行合作，用低至$5.5嘅呎租，出租12至13間喺黃竹坑工廈嘅工作室畀香港嘅青年視覺藝術家同媒體藝術家；畢業唔超過3年嘅仲可以申請半費租金資助，最低租金可以去到每月1100蚊！

畢業生最低月租1100

呢個計劃為期6年，頭兩年呎價$5.5，後兩年$6.5，第五至六年就8蚊，藝發局再另收營運費，頭兩年暫訂每呎$2.5。Emily計過，啱啱畢業出嚟，租最細嘅400呎工作室搞藝術，月租只要1100蚊，加埋營運費1000蚊，一個月畀2100蚊出嚟就得。


最抵嘅係，工廈家改裝緊，協成行話改裝後會每呎租到15蚊，加上大廈對面遲啲仲會開埋港鐵黃竹坑站，租金到時分分鐘「天價」都唔定，今次申請到嘅藝術家真係可以話執到寶喇！