七一酷熱 梁栢賢籲多喝水

【明報專訊】七一回歸係港人大日子，今年仲多咗建制派大派飲茶五折等優惠，加上演藝團體喺啟德搞音樂騷吸引fans，相信當日有唔少人外出。天文台預測，下周一7月1日天氣酷熱，氣溫最高33℃，但黃昏會有幾陣驟雨，市民無論去遊行定聽音樂會，都咪話唔驚中暑。


醫管局行政總裁梁栢賢就話，知道今年七一特別多活動，會喺遊行嘅港島區同啟德所在嘅九龍區做好應變措施，佢話每年七一都有大型遊行，醫管局一向有應變經驗，所以唔擔心到時有太多人唔舒服，但就提醒市民要飲多啲水，以防中暑。醫管局發言人話，公立醫院急症室同12間普通科診所會照常服務。