葉劉：為23條經歷而喊

【明報專訊】前保安局長葉劉淑儀10年前硬推《基本法》23條立法，最終搞到市民唔鍾意佢，仲黯然離開政府。10年過後，貴為行政會議成員嘅葉太接受商台節目《在晴朗的一天出發》訪問時，回顧當年推23條嘅日子，嗰時要單打獨鬥嘅佢話，當年喺立法會草案委員會自己去到足，簡直係捱打捱鬧咗100個鐘。有朋友同佢講，「特區政府啲男人死晒呀？點解唔出嚟（幫手推銷）？」


友問﹕特區政府男人死晒？

葉太話，當時律政司長梁愛詩話23條係港人頭上一把刀之後，基本上再無出嚟幫手推銷。雖然佢一個女人負責對外推動立法，但強調自己只係推銷員，唔可能自己拍心口做決定，包括係咪推白紙草案等。


唔少人記得葉太當年同民主黨涂謹申喺議會鬧交嘅片段，葉太就話，其實喺草案委員會100個鐘都好靜，只係佢後來忍唔住駁了一句。Emily搵番資料，佢嗰句應該係 「涂議員情緒太激動，又唔守規矩，又冇禮貌，我唔會再答佢問題」。


呢段話成為當日電視頭條，令事件火上加油，葉太說「對我傷害好大」。作為女強人，葉太話推23條時無為此落淚，但事後回想呢個慘痛經歷時，就忍唔住喊。