七一遊行10年「主角」盤點

【明報專訊】民陣2003年七一首辦大遊行，俗語話十年人事幾番新，但香港政制十年來仍未「番新」得令市民滿意；另一邊廂，當年矛頭之一、被諷「掃帚頭」嘅前保安局長葉劉淑儀，就早已「翻身」，由被上街市民大罵，到今天獲選民認同晉身立法會，貴為十大議員，葉太形容「十年前環境的確好獨特」，先會有咁多人上街，又話今時今日做議員，自己都作咗好大努力，希望大家睇到佢服務香港嘅誠意。


稱3箭靶生活唔錯

其實，2003年50萬人上街，時任特首董建華同財政司長梁錦松亦被高喊下台，最終3人先後辭職。提到當年「3個箭靶」，葉太話佢哋家都過得唔錯，好似董生咁，發起中美關係交流基金會，仲成日陪國家主席習近平訪美。阿松回歸做私募基金，又湊住3個仔女，都咪話唔寫意。


講到遊行道具，過去10年可謂創意無限，03年時任律政司長梁愛詩形容23條立法有如「把刀架喺頭上」，唔少市民遊行時就整咗把紙刀放喺頭上諷刺政府。唔知今日遊行又會見到乜嘢得意道具呢？


2003年已經做遊行搞手嘅民陣召集人孔令瑜同Emily講，仲記得03年遊行時一度因場地保險問題卡住，好彩最終順利舉行，近年警方亦用唔同方法阻撓，佢話留意到建制派過往同民陣活動都相安無事，今年「踩正你個頭」咁撞晒時間，佢有啲擔心市民對於無聲無色嘅變化放輕手腳，隨時令日後連七一遊行都搞唔成、消失呀咁。