將軍澳人易物減廢反堆填

【明報專訊】政府撤回擴建將軍澳堆填區計劃，將軍澳街坊暫小勝一仗，但政府已表明出年會捲土重來。為顯示減廢決心，西貢區議員方國珊噚日舉辦以物易物活動，證明將軍澳人願意以身作則，擔當起帶領18區居民減廢嘅先鋒角色。活動朝早11時至下午4時喺調景嶺善明苑舉行，有幾百居民響應，有人用一部新淨電腦換物，結果唔使幾分鐘就畀人換走咗，令呢部電腦得以再用。


將軍澳堆填區擴建叫停，但方國珊話仍然唔能夠鬆懈，佢今日會喺七一遊行路線中途擺街站，除咗向市民講解反對擴建堆填區原因，仲會即場收集宣傳單張同膠樽攞去循環再造，呼籲市民做好減廢回收。