學民再獲「婆婆」捐生果金

【明報專訊】一年一度嘅民陣七一遊行係唔同團體籌款嘅好機會，今年「佔領中環」運動係遊行重點，唔少人見到佔中嘅街站，都好主動咁塞錢入籌款箱，現場所見箱內有好多100蚊紙，亦有唔少大牛甚至金牛。


佔中錢箱有大牛金牛

表明扣除成本後會將籌款捐畀佔中秘書處嘅民陣，亦有唔少市民支持，不過要講「吸水」最勁嘅，當然係有政治明星幫忙。其中天主教港區榮休主教陳日君樞機雖然無參加遊行，但傍晚就去到中環皇后像廣場附近、即係遊行終點前，罕有地拎住民陣錢箱籌款，市民見到樞機都好主動捐錢。陳日君批評現屆政府表現差，認同市民表達訴求同對政府嘅不滿，仲形容家政府管治好似「一盤散沙」。不過佢話唔會要求特首梁振英下台，目前正考慮係咪參與佔中。


國教關注組受歡迎

除咗佔中三子同陳日君，國民教育家長關注組同學民思潮都係較受歡迎嘅，兩者噚晚話捐款數字仍在點算。家長關注組發言人陳惜姿感謝市民踴躍支持，佢估計多數支持者都係反國教科嘅市民，有人叫家長組「加油」，亦有人高呼「繼續幫我睇住（國教）」。


學民思潮發言人周庭指捐款反應熱烈，另一發言人黎文洛喺facebook上載一張婆婆嘅留言字條，字條字體秀麗，婆婆話為支持佢哋，捐出半個月生果金請學生飲水，學民話，從字迹睇，相信係去年捐出600元、即半個月生果金嘅同一個婆婆。