稱變控訴大會可悲 林大輝寧取消七一假

【明報專訊】自從2003年七一50萬人上街後，每年回歸日都有唔少市民出嚟遊行，立法會噚日就七一遊行作動議辯論，廠商會議員林大輝話，家每年七一變成控訴大會，係一件好可悲嘅事，對此感到唔高興同好煩，寧願嗰日唔放假，因為返工會少啲爭拗，開心啲喎。


稱七一返工少爭拗

大輝又話，有人開心慶回歸、有人就參加遊行，大家思維唔同，分歧內耗，咁樣分裂法，香港仲點發展，競爭力只會一蹶不振。公專聯莫乃光跟住就起身反駁，話取消七一假期，慶回歸嗰啲人可能無所謂，但幾十萬參加七一嘅香港人真係唔肯過你，又話香港政府夠膽就取消埋十一國慶同元旦假！


講七一就當然唔少得講普選，民建聯蔣麗芸話，如果有一日，學生對父母同老師會講早晨、啲人喺港鐵會讓坐、連拖狗嘅人都會自動自覺執番狗屎，香港嘅民主就真係成熟同有希望，不過Emily就唔多知道呢3樣嘢同民主普選有乜關係喇。