青年愛篤機 民記微電影教自控

【明報專訊】民建聯家庭事務委員會先排做咗問卷調查，了解年輕人上網同打機嘅習慣，發現原來有15%受訪嘅青少年，每日平均花8個鐘以上上網同打機。為咗教大家遠離呢個「篤機」習慣，民建聯最近拍咗套微電影叫《低頭》，不過委員會主席鄭泳舜（Vincent）就唔肯透露電影中嘅「自控篤機五式」係邊五式，話要今日記者會先揭曉。


公開招演員 杏兒姐夫無份拍

呢套係民建聯第一套微電影，但Vincent話佢無粉墨登場，演員係喺出面公開招募嘅。查實Vincent同演藝界都幾有淵源，皆因Vincent係藝人胡杏兒嘅姐夫，Vincent就笑笑口話，今次只係民建聯微電影系列嘅第一部，下一部佢都諗吓應徵演員，Vincent喺政壇都算靚仔，唔知又有無杏兒咁好戲？