財爺請CY食檸檬

【明報專訊】梁班子不和消息時有所聞，例如特首梁振英（CY）同財政司長曾俊華被傳唔多夾，但財爺就話過愈做愈興奮。噚日經濟發展委員會召開第二次會議，開到成下晝1點先完結，相信各人都已經肚餓，梁振英喺記者會答咗幾條問題就轉身走人，Emily聽到CY邊行邊問財爺﹕「你今日去唔去canteen（政府總部飯堂）食飯？」CY出口邀請，但曾俊華就當面請上司「食檸檬」，同CY講﹕「我今日帶咗飯。」


CY同蘇澤光劉炳章撐枱腳

無財爺陪，梁振英都仲有其他人陪吃。噚日出嚟見記者嘅除咗官員，仲有經發會下嘅4個小組召集人，包括行會成員周松崗、貿發局主席蘇澤光、前行會成員羅仲榮同「梁粉」劉炳章。Emily喺canteen就見到CY同蘇澤光、劉炳章撐枱腳，而周松崗買完三文治就急急腳離開。


解畫：下晝有活動

其實唔少人都撞過財爺喺canteen食飯，不過據財爺身邊人講，如果財爺事先無約人，通常都會帶自家飯食，加上噚日下晝佢要出席另一個會議，所以好少時間食晏喎。


財爺噚日除咗唔陪CY食飯，連開記者會時都唔係太情願講嘢。佢哋匯報經發會工作，梁振英講嘢，其他官員及成員企開一邊，距離CY遠遠。梁振英請財爺同在場記者講幾句時，財爺都顯得唔係好情願，最終先講咗幾句有關經發會嘅工作。