愛港力圍鬧美國旗tee男

【明報專訊】愛護香港力量一向都打正「愛國愛港」旗號，Emily噚日喺網上見到「十萬人反對『愛護香港力量』」facebook群組上載咗一段5分鐘短片，愛港力約10個成員喺灣仔港鐵站外，圍住兩個相信係司機同跟車嘅男子，大叫「漢奸走狗」、「食屎狗」不下十幾次，因乜解究咁惡？

Emily見到跟車嗰位仁兄身穿有美國國旗設計嘅T恤，唔知係咪因為咁樣辣㷫咗愛港力班人。愛港力指控個司機打人，話要報警處理，仲粗口橫飛，阻住佢哋走，其間愛港力有人講到明「你係乜×中國人啊，你無祖宗啊」，召集人陳淨心就做塘邊鶴，無加入戰團。片段所見，兩名被截停嘅青年都好不滿，但亦好無奈。