財爺那些年 狂迷Silver Surfer

【明報專訊】財政司長曾俊華興趣多多，除咗較中產嘅話劇，原來佢都好漫畫，佢噚日就喺網誌度話，自己當年喺美國讀書時成日煲漫畫，最鍾意嘅角色係冷門少少、未「獨立」前喺「神奇四俠」嘅Silver Surfer。佢話Silver Surfer唔似一般英雄人物，而係一個性格複雜、亦正亦邪嘅獨行俠。財爺仲珍藏咗1968年出版嘅創刊號漫畫，仲話就算好朋友相借，都未必肯借出喎！


珍藏1968年創刊號

財爺前日出席由「創意香港」辦公室喺維園舉辦嘅「盛夏香港．動漫啟航2013」嘉年華會，話好開心見到好多青年朋友加入動漫創作。佢話一個漫畫人物只要能夠深入民心，就可以帶動巨大商機。


財爺年輕時都係標準漫畫迷，佢話初中時喺美國零用錢唔多，但每星期都必定儲起一個25美仙（即華僑叫嘅「錢八」）買一本漫畫書，睇完後再將佢作為「本錢」，跟同學交換其他漫畫書睇。


財爺話，佢最鍾意全身銀色、攞住一塊銀色滑浪板嘅Silver Surfer。呢個人物造型簡約，無犀利武器，一度想侵略地球，後來又出手保衛地球，角色充滿矛盾，係一個頗為悲劇嘅人物，財爺覺得佢性格複雜，有別於一般英雄人物喎。