民建聯去加拿大向華僑宣傳

【明報專訊】暑假到，立法會7月中起都會休會兩個幾月，過去民建聯都會趁假期擁抱祖國，帶團返內地考察兼拜會當地官員，今個暑假民記會出團，但就唔再北上，而係去加拿大見當地華僑，講解一下民建聯理念。


呢個外訪團由民建聯主席譚耀宗帶團，人數唔多，主要以立法會議員為主，包括陳克勤、陳恒鑌同李慧琼等，暫定8月出發去溫哥華。呢團人似乎唔係個個都能夠講到流利英語，不過唔使怕，皆因佢哋基本上只係接觸當地香港人，去到都係講番廣東話啫。


要去到咁遠宣傳當然有原因，原來佢哋睇中當地華人社區夠團結，隨時喺選舉上發揮影響力，據講當地有組織同民記講，香港唔少政黨都去過做宣傳，但話未見民建聯，唔多唔少促成咗今次訪加團。支聯會、人民力量等組織去得咁遠宣傳，通常都會籌款，但民建聯咁有米，今次出團只係介紹同宣傳，無打算順道吸水。


政治正確 唔揀美國

Emily聽聞，今次選擇去加拿大而唔去埋美國，就同民建聯政治正確有關，因為斯諾登事件已經搞到中美關係緊張，如果去埋美國，可能隨時要拉橫額抗議美國入侵中港兩地電腦先得喇。