團友拍片鬧領隊 網民抱不平

【明報專訊】去旅行都係想開開心心，一班去泰國嘅港人團友，其中有人話入住嘅酒店房有臭味，半夜三更向女領隊要求轉酒店，女領隊就話可以幫佢哋手訂過另一間酒店，但團友需要自己搭車去新酒店，於是有團友死心不息，狂鬧女領隊，更將過程拍片放上網。結果係點？哈，大部分網民都讚領隊專業、EQ高，仲幫佢大反擊，人肉搜尋到其中一個團友原來喺旺角一大型電器舖返工，聲言會落去「感受」一下佢嘅服務態度。


自行換酒店 康泰酌情升級

康泰旅行社企業傳訊經理方慧儀話，出事旅行團係佢哋嘅泰國曼谷芭堤雅5日4夜團，團費每人1799蚊，上個月出發。方慧儀話，有11名團友喺第三晚向領隊投訴房間有臭味，要求換酒店。最終嗰班團友自己畀錢搬去另一間酒店，而康泰亦酌情喺嚟緊嗰兩日將酒店升級，先至平息事件。


對於有網民指班團友乘機唔畀每人400蚊嘅貼士，方慧儀收到消息話佢哋噚日已經自己去番分行畀番嘞。