女生假睫毛「大眼仔」去大學面試

【明報專訊】中學文憑試（DSE）考生今個月15號放榜，呢班未來社會棟樑開始去大學面試，但Emily聞說怪獸家長又出動喇！話說噚日喺城市大學社會科學部面試日，有同學仔「出奇招」，有負責面試嘅講師喺facebook爆料，話有男同學帶埋阿媽去面試，女同學都唔輸蝕，黐晒假眼睫毛、戴埋「大眼仔」隱形眼鏡，真係「做足準備」呀。


負責今次面試嘅社會科學部講師方志恒（Brian），一早準備問題考考同學仔，佢事後喺facebook同大家講，面試時見到「騎呢搞笑嘢」，「今日Admission Interviews，有男同學帶埋阿媽嚟面試，亦有女同學搽厚粉黏假睫毛戴大眼仔」。不過，佢就無提到同學仔呢啲表現會唔會影響被錄取嘅機會。


討論佔中 同學：民主派賣港

Brian話，噚日小組討論其中一條問題係同學點睇「佔領中環」，最常聽到嘅回應，都喺話佔中可以公民抗命同喚醒港人，亦有人話佔中成本太高，但叫佢驚訝嘅係，聽到有人話覺得「民主派出賣港人」。Brian稱遇上學民思潮嘅同學仔，面試時話覺得佔中搞得太複雜同排斥年輕人喎。