無國界醫生日 新百貨豪捐45萬

【明報專訊】啱啱過咗嘅星期日（7月7日）係無國界醫生日，前排周圍都可以見到今年行動大使陳奕迅呼籲大家捐出1日人工嘅廣告。不過，要講用實際行動回應得最積極嘅當屬新百貨（0825）。集團早前就向中港兩地超過2.5萬名員工募捐，鼓勵同事捐出一日收入，參與「無國界醫生日」。短短數日間籌得善款45萬港元，並連續7年成為呢個活動籌得最高善款嘅機構。


微博轉發無國界醫生博文

出錢之餘，新百貨仲發動全線41間分店嘅微博平台關注無國界醫生官方微博，同時每間分店嘅微博亦都轉發無國界醫生嘅微博。新百貨41間分店加加埋埋都有300萬粉絲，單係一家店嘅轉發就有3000人睇過，都算有幾大號召力，同時又唔使多使一分錢喔。除咗微博，據講新百貨嘅微信平台都搞咗幾個月，雖然開展時間好短，但粉絲超過30萬人。小琴估唔到，喺微博、微信上，新百貨呢間老牌百貨行得都幾前！