阿人會著六四tee見張曉明

【明報專訊】中聯辦主任張曉明下周二將會破天荒到立法會同議員食飯，各界關注又期待，民主派罕有地無批評，仲歡迎對方去。不過食飯還食飯，當日民主派點都會向對方抗議，其中工黨主席李卓人當日就會代表工黨坐主家席，佢話會著上「平反六四」嘅T恤。


代表工黨坐主家席

除咗著平反六四Tee，李卓人作為支聯會主席，亦打算將過去咁多年交唔到畀中聯辦嘅請願信，一次過畀晒張曉明主任。至於其他民主派，據講亦有人會著七一大遊行著開嘅Tee，甚至係佔領中環主題嘅衫。


但黃毓民表明唔會出席飯局，因為覺得無咩好同中聯辦聯誼等，唔去食飯，毓民就話無謂去抗議喇。不過，社民連主席梁國雄就話，當日佢唔會食飯，但都打算去抗議，具體行動長毛就話諗緊喎。


毓民唔去 長毛諗緊點抗議

街工梁耀忠噚日亦表明唔會去同張曉明食飯，因為現時特區政府施政被中聯辦影響，同張曉明溝通意義唔大，佢覺得中聯辦作為中央政府代表，應該同議員喺民主進程上溝通，而唔係只做社交，期望對方拎出誠意同民主派對話，將中央睇法同議員交流。