南區區會傾反佔中 民主黨諗計拉布

【明報專訊】建制派喺18個區議會策動反對「佔領中環」，一半區議會已經通過反佔中動議，南區區議會亦排咗期喺18號傾呢個議案。民主黨區議員羅健熙話，建制派喺區會內佔多數，反佔中議案一定可以通過，但佢話4個民主黨員諗計仔，要建制派議員為議案「付出代價」，計劃有樣學樣喺區會搞「拉布」，提出修訂，拖得幾個鐘就幾個鐘。


要建制齊齊焗桑拿

羅健熙話近日區會會議室冷氣壞咗，如果到時仲未修理好，佢哋拉布，建制派議員都要一齊焗吓桑拿！佢話，正路每個議員大概只有6分鐘發言時間，因此泛民議員輪住講，都只係得半個鐘，所以佢哋要諗辦法提出修訂，玩吓議事規則增加發言，拖延時間。


羅健熙話政府喺區會做勢，好似以前政改「起錨」、高鐵工程等，其實無乜意義，就算通過議案，都唔代表市民支持喎。


區會主席盼唔好開到半夜

南區區議會主席朱慶虹就話，如果議員符合議事規則，佢唔會阻住人表達意見，議會有唔同意見無所謂，但唔希望開會開到半夜三更。