東涌基層家庭免費睇水母

【明報專訊】「亞洲國際博覽館」請人時會優先考慮當區居民，搞活動亦諗起區內兒童。今日開鑼嘅年度親子盛事《探索大自然遊學園X動物農莊2013》，一家三口正價入場費要二百幾三百蚊，亞博館於是同兩個地區團體（東涌安全健康城市及香港聖公會東涌綜合服務）合作，招待區內基層家庭同少數族裔家庭嘅兒童與家長，共約100人喺《動物農莊》免費玩，希望佢哋喺佔地超過11萬平方呎嘅嘉年華，可以體驗一下擠牛奶、耕種、挖掘「恐龍化石」、觀賞形態萬千嘅水母（圖）、近距離接觸大小動物等等經歷，喺暑假增添歡樂。嘉年華由今日起至14號。