發叔返自由黨？ 田少話誤會

【明報專訊】屯門區議會主席、經民聯劉皇發（發叔）呢排因為擴建堆填區一事做咗風頭躉，噚日發叔一喺立法會出現，就畀廿幾三十個記者行家包圍，逼到Emily眼尾都睄唔到佢。發叔曾經係自由黨員，近排有傳自由黨叫佢回巢，黨魁田北俊（田少）特登出嚟澄清，講到明無意挖角。


田少同Emily講早幾日喺立法會撞到發叔，發叔當然把握機會叫田少反對擴建堆填區，田少反建議佢搵番經民聯傾好過，仲講笑咁話「除非你想加入番自由黨啦」，佢懷疑因為咁樣，就有議員傳自由黨想挖角。


派尖子惡鬥京士柏補選

另外，油尖旺京士柏選區原議員、西九新動力梁偉權，早排因為選舉違規被法院裁定當選無效，區會議席將要舉行補選。不過，今次建制派或者會鷸蚌相爭喇，皆因自由黨好可能派出男拔會考8A尖子、會計師符傳富出戰。噚日自由黨喺政總外搞抗議中九龍幹線走線，就專登派佢出嚟企中間爭取曝光，仲搵咗主席周梁淑怡同立法會航運交通界議員易志明傍住。符傳富同Emily講會積極考慮出選，又話半年來服務地區成績有目共睹。但係梁偉權應該會捲土重來，建制派咁爭，唔知會唔會益咗上次區選以兩票之差僅敗嘅民協林健文呢？