林煥光自嘲文章無人睇

【明報專訊】行政會議召集人林煥光近期拋出2020年取消立法會功能組別建議方案，成為風頭人物，真普聯召集人鄭宇碩見佢咁積極推動政改，趁機約佢傾偈，點知林煥光寫咗封200幾字嘅email請佢食檸檬，仲話早幾個星期前已經喺一份英文報章寫文章發表政改意見，叫鄭宇碩睇番，唔想嘥對方時間喎。


唔係想推銷個人理念

仍活躍喺行會嘅林煥光，喺電郵中話自己已經「半退休」，仲強調之前喺公開場合講有關政改嘅嘢全屬個人意見，絕對唔代表特區政府同行會非官守成員。佢發表意見唔係想「promote」（推銷）自己嘅政改理念，只係想提醒大家，「政改唔係得普選特首」，如果唔係就會遺漏咗重要嘅元素。


唔想嘥鄭宇碩時間

林煥光嘅回信成200幾字，但最終都係拒絕同鄭宇碩見面，佢解釋，已經多次喺唔同嘅場合講過自己立場，仲自嘲佢幾個星期之前仲喺其中一份英文報章寫過自己嘅意見，原來無人睇過篇文，無人留意到（nobody noticed）。