范國威認衰

【明報專訊】泛民前獨立議員鄭家富（阿富）上屆唔選立法會，而前民主黨友、新民主同盟立法會議員范國威仍成日搵阿富幫手，噚日有報道話阿富以范嘅法律顧問身分，申請咗兩張泊車證，唔係議員但仍用立會泊車位。范國威噚日認衰，佢話嗰兩張泊車證係合法申請，但阿富未試過喺停車場長期同時停泊兩架車，不過佢承認，有時阿富車轉車時，或者會同一時間泊咗兩架；而阿富噚日就決定交還兩張證，下次到立法會只會用臨時泊車證，阿富又向范國威道歉。


范國威亦就事件向公眾致歉，話將來會用更嚴謹標準同更高政治敏感度處理。秘書處就話，每個議員喺任何時間只可以停泊一架車。至於范國威咁做喺咪待人從嚴、待己從寬，佢就話事件係對自己嘅鞭策，議員都要嚴以律己。


高球碌入會議廳抗議

講起范國威，佢一向鍾意做「行為藝術」，佢噚日帶咗一袋高爾夫球去立會，趁特首答問大會時碌出去（圖），之後又收番，代表要收番粉嶺高球場以代替新界東北發展。不過佢做呢個「行為藝術」時，正值絕食嘅人力議員陳志全不適暈眩，Emily等行家就無乜時間理佢。