慢必絕食 瘦足15磅

【明報專訊】人民力量議員陳志全（慢必）前日喺立法會行政長官答問大會中暈眩送院，終於結束絕食，瞓咗半日醫院休息後出院，噚日現身立法會出席財委會會議。佢呢次由七一遊行開始嘅絕食，達唔到想要嘅結果，即係特首梁振英下台，但最少都有一個「收穫」，就係清減咗15磅，體形清瘦咗！


暫食流質食物營養奶

慢必不適送院，好多支持者都關心佢狀况，佢話醫生同佢講，如果恢復進食就可以即刻出院，否則要留院吊鹽水。佢最終恢復進食，暫時先食流質食物同飲營養奶，因為腸胃停工10日，一下子食得太多，好易腸胃炎。


慢必話，前日喺立法會體力不支，當時仲有少少知覺，家身體已無大礙。佢話，絕食期間不時胃痛，又試過發冷，最憂慮嘅喺出現過2次尿酮（ketone）過高現象，擔心腦細胞會因而受損，好彩最終無事。


慢必絕食期間除咗擔心自己身體，更擔心媽媽，因為媽媽喺佢絕食期間曾經入過醫院，但佢無法探望，所以噚日佢精神少少，即刻去見媽媽。


唔排除再絕食

今次絕食喺社會上引起嘅迴響好似一般，但慢必話，唔會期望一次嘅社會行動可以達到目的，佢只喺能力範圍內做啲事。佢話唔排除將來再絕食，仲話印度聖雄甘地都絕食十幾次咁講。