Miss Mo不滿新聞用內地譯名

【明報專訊】公民黨毛孟靜（Miss Mo）同新民主同盟范國威（Gary）早排成立「香港本土」，主打本土議題。佢噚日搞個茶敘，話近排兩間電視台好多新聞報道，都用內地譯名，漸趨大陸化，所以去信通訊事務管理局，要求局方關注咁話。

CY朗朗上口 憂成統戰工具

Miss Mo同Emily講，早排有電視台將戴卓爾夫人譯為撒切爾夫人，做過記者佢聽到，就好似將佢前半生切割。除傳媒，佢話特區政府都講多好多內地用語，其中特首梁振英（CY）就係佼佼者，好似成日講「方方面面」、「重中之重」、「適時」（見右表），質疑若果引入內地用語一套，習慣成自然，擔心成為內地統戰工具，仲會永不超生。

Emily唔知情係咪真係咁嚴重，但係香港文化不溜都係兼容並蓄、百花齊放，唔知港人將韓語、日語、英語潮語字拿來使用，Miss Mo又點睇呢？

Gary就話，內地同香港翻譯同一樣，得出完全不同結果，認為內地翻譯不符合「信、雅、達」原則，好似電影《捉智雙雄》，內地就跟足英文原名《Catch Me If You Can》，譯做《來找我啊，如果你可以》，話聽落都有怪。