Miss Mo陳雲破冰一握

【明報專訊】一年一度書展噚日開鑼，Emily都有去湊熱鬧，專出政治題材書嘅次文化堂係落腳點之一，但無諗過竟然見證咗人稱Miss Mo嘅立法會議員毛孟靜，同埋本土派代表、人稱「大師」嘅嶺大學者陳雲嘅「世紀握手」。


話說大師曾經喺facebook上宣稱要同「激進本土派」Miss Mo「分手」，原本以為佢哋道不同不相為謀，點知喺次文化堂攤位相逢，Miss Mo即時捉住大師握手高呼﹕「嗱，我哋無分手呀！」

大師fb曾宣布「分手」

話說今年次文化堂幫唔少人出書，好似Miss Mo教人用英文講本地詞語嘅A Sea of People，又幫陳雲出版咗《陳雲激語錄》同埋學民思潮成員編著嘅《學民讀白》等。


次文化堂噚日下晝邀請多個作家站台，Miss Mo同大師不單止趁機握手，合照時仲互相拎住對方本書做宣傳，場面溫馨到謀殺菲林，仲吸引好多人湊熱鬧，搞到學民仔張秀賢都被搶晒風頭。書展攤位咁有人氣，最開心嗰個就梗係次文化堂社長彭志銘啦！