林鄭代CY投訴長毛掟牌

【明報專訊】中聯辦主任張曉明前日去立法會午宴，泛民「示威」克制，對比特首梁振英（CY）上個禮拜四去立法會答問大會，就面對另外一番對待。當日社民連梁國雄（長毛）同另一議員將3件示威牌掟向CY，CY無事，但係就由政務司長林鄭月娥出手，去信立法會主席曾鈺成投訴，話呢類「不敬行為」嚴重擾亂秩序，仲會構成人身傷害，絕對唔可以接受！


林太又話，新民主同盟范國威又碌咗幾個高爾夫球出議事廳通道，指呢啲不檢行為嚴重干擾答問大會。雖然曾主席果斷執法，但當局對於過去多次都有議員對公職人員掟嘢，都認為事態嚴重，希望同類事件日後唔會再發生。


曾主席：同意極唔檢點

曾主席噚日回覆，同意長毛、人力兩名議員同黃毓民行為極唔檢點，佢話當時已經命令退席，又叫管事即刻執番啲高球，強調會繼續嚴格執行《議事規則》，確保會議順利舉行。