浸大學者乘蛟龍號見玻璃海綿

【明報專訊】中國載人深潛器「蛟龍號」上月首次試驗性下潛，浸大生物系副教授邱建文係唯一一名參與嘅香港科學家。佢話，雖然專責研究海洋生物，但之前甚少出海經驗，更未試過下潛到千幾米嘅深海，形容過程十分難忘，期望下年可以再次參與。


40日航程 「十分難忘」

邱建文同6名科學家上月10日於廈門出發，前往南海冷泉區，整個航程歷時40日。研究共採集了7至8類、共約200個生物樣本，包括首次喺冷泉區發現嘅玻璃海綿、深海貽貝同鎧甲蝦，佢仲帶咗約30個樣本返港進一步研究。


潛海7小時唔夠喉要加時

佢同兩名潛航員於上月19日下潛到約1320米嘅深海。以前對深海印象只限於紀錄片中色彩繽紛嘅海洋世界，喺下降過程中，佢發現只有小量微生物喺海中浮游。


到達目標海域時，親眼見到大量珍貴嘅深海生物時，令佢十分吃驚。本來計劃下潛7小時，最後仲因為佢唔捨得深海環境而要求延長咗半小時