語梁家傑曹二寶：要幫手搵中聯辦

【明報專訊】中聯辦主任張曉明日前率領一眾官員去立法會同議員食飯，中聯辦研究部長曹二寶就坐喺公民黨黨魁梁家傑、經民聯盧偉國中間，據稱當日曹二寶同梁家傑雞啄唔斷，原來曹除咗澄清要搞第二支管治梯隊係傳媒誤會外，仲同梁家傑講，地區有咩幫手，隨時可以搵中聯辦喎。


二人坐埋一齊 雞啄唔斷

傑哥噚日同傳媒茶敘時話，曹二寶當日講個唔停，佢當然禮貌回應，亦同對方講，中聯辦唔應該介入本地事務，仲舉例話舊年選舉時謝偉俊同白韻琹車居民上深圳食飯，中聯辦副主任林武仲上台講嘢。而曹二寶聽完後就指林武負責地區工作，食飯同居民講幾句好正常。跟住仲同傑哥講，如果區內有咩事中聯辦可以幫手，佢哋可以隨時出聲喎。


政改方面，傑哥表明到時公民黨投票立場，會按照電子公投嘅結果，強調要跟市民意願投票。傑哥強調中央對特首有任命權，但唔等於可以隨時罷免，但如果中央解決呢個問題就畀香港有真普選，傑哥話呢啲問題絕對有空間探討喎。