李小龍鍾意整蠱人

【明報專訊】聽日係李小龍逝世40周年，全球嘅影迷相信都會一同懷念呢名一代武打巨星。李小龍嘅大家姐李秋源噚日同一眾李小龍迷飯敘，佢話細佬最鍾意食蝦餃、芒果乾同龍眼，最鍾意嘅歌仲係My way。


最愛食蝦餃聽My way

李秋源仲話，小龍好鍾意整蠱人，有次小龍喺日本帶咗本書返嚟係咁叫人睇，姐姐一拎起就被本書電親，原來嗰本係一個整蠱玩具嚟嘅。


同場嘅仲有李秋源嘅美籍養子Esparza，佢話自己個花名Wolf其實都同李小龍有關。話說李秋源有日發夢夢見李小龍送咗隻寵物畀佢，佢以為係隻狗，但小龍好強調係隻狼。佢發完呢個夢之後無幾耐就遇到Esparza，所以幫佢改咗個名叫Wolf。