蔡子強惜住捧場高官

【明報專訊】書展聽日（23日）最後一天，中大政治與行政學系高級講師蔡子強今年都有出書，但呢本書嘅書名同主題似乎嚇親啲高官喎。話說蔡子強隔咗一排無出書，今年有新書，有高官特登搵佢，話會去書展捧佢場，同佢影吓相。蔡子強好心提醒，佢本書叫《拆穿官場語言偽術》，擺明針對特首梁振英（CY），高官聞言有啲尷尬，話佢會照去書展，但請佢唔好將合照放上網。


之前推出嘅《新君王論》系列反應唔錯，蔡子強今次就同商台《左右大局》節目主持人黃潔慧合作出書。蔡子強解釋，原來佢喺中大開班，其中一個主題係講政治辯論，佢見黃潔慧辯論隊出身，就請佢嚟一齊教。上堂嗰陣，佢留意到黃潔慧用咗唔少時事例子佐證，同學反應幾好，於是打蛇隨棍上，邀請對方一齊合作寫書，揭穿CY等高官嘅語言偽術。