樂施會半價賣名人名牌貨

【明報專訊】想著名牌衫但又想慳錢？樂施會噚日展開「名牌義賣周」籌款活動，直至今個禮拜六（27日），喺中環怡和大廈「樂施商店」，可以半價或以上嘅優惠，買到名人或市民捐出嘅二手名牌手袋、皮鞋同衫（部分見圖），其中前港姐趙雅芝就捐咗一對Chanel鞋，1500蚊就買到，相信唔少女士聽到都心動！

100件貨 兩個鐘賣出一半

除咗趙雅芝，其實仲有好多名人同市民都出咗一分力㗎，不過佢哋就唔想透露。


樂施會話，手袋同鞋各有100件，但噚日短短兩個幾鐘頭就已經賣出一半，睇嚟真係有買趁手喇。樂施會就期望透過今次義賣可以籌得大約30萬元。


梁愛詩話「筲箕論」好複雜

基本法委員會副主任梁愛詩噚日都以董事會成員身分出席活動，但佢見到Emily就走夾唔唞。行家問詩姐點睇中聯辦主任張曉明嘅「筲箕論」，佢淨係話件事好複雜同嚴肅，唔可以喺條街度接受訪問，有機會坐低慢慢傾。至於泛民或者因此唔接受政改方案，詩姐就話唔好咁多擔心，做啲實際嘢喎。