No. 1議員 曾鈺成威威

【明報專訊】呢一屆立法會任期剛休會，港大民意研究計劃就公布最新嘅十大立法會議員排名榜，近期請到中聯辦主任張曉明去立法會同議員食飯嘅主席曾鈺成，就人氣爆燈，不但蟬聯榜首，佢得到59.6嘅評分，仲係佢回歸以來嘅新高，真係可喜可賀！

新民黨排二三位

港大今次公布嘅調查，係7月12日至17日期間所做，而張曉明飯局喺16日舉行。港大先搵市民甄選咗最多人認識，即知名度最高嘅12名議員，然後再做第二輪民調評分，然後得出最高評分嘅十大議員。所以，港大都話，可能有啲議員表現好，同埋受市民支持，但可能因為全港知名度不足而唔能夠躋身十大。


除咗曾主席咁勁，今次新民黨都「巧威威」，喺最新排名中，兩名議員葉劉淑儀及田北辰，分別排第二位及第三位。令人驚喜嘅係，田北辰首次入圍便位列高位，係今次唯一入圍嘅立法會新丁，排名比阿哥、自由黨田北俊（第五）仲高。


田北辰勁過阿哥 話唔明點解

田北辰就話，對於結果感莫名其妙，唔知自己點解上榜，仲講笑話可能係葉太帶挈令佢多咗人認識！不過，佢話自己平時多就工廈劏房戶等民生議題發言，而市民較關心民生議題，所以可能支持佢喎。


港大亦綜合過去一年多次嘅調查，得出平均分及全年排名，排首位依然係曾鈺成，其次為葉劉淑儀、民主黨劉慧卿等。