民主黨fb有3000 like

【明報專訊】民主黨以往畀人感覺較為老餅，所以上年特登成立咗創意媒體部，呢年幾嚟銳意搞宣傳攻勢，噚日facebook專頁終於吸引到3000個「讚好（like）」。委員羅健熙自嘲話，民主黨喺網上世界艱苦經營，雖然like數目唔係好多，不過都希望可以扭轉一面倒局面喎。


創意部長：撬無綫人拍片

創意媒體部噚日搞咗個茶敘，部長黎敬瑋（Kelvin）同Emily講，成個部門家有十幾人，由平面設計到多媒體都有，仲專登請咗喺無綫做過嘅人幫手拍短片，啲片明顯pro啲，瀏覽率都高啲。佢哋又打算統一橫額、易拉架、卡片等宣傳物品設計，全部由青綠色變晒墨綠色。


投資8萬 多拍議員生活

Kelvin透露，個黨出咗8萬幾蚊投資拍攝器材成立DPTV（民主黨視頻），希望宣傳設計都由自家做番。10月起會拍多啲立法會議員同地區黨友日常生活短片，好似主席劉慧卿（卿姐）點樣用英文「和理非非（和平、理性、非暴力、非粗口）」鬧人，胡志偉就教人去食平嘢，何俊仁會講養狗心得，黃碧雲可教政治通識，卿姐仲講明畀佢哋拍乜都得。羅健熙話，創意媒體部最大樣嘢就係要搞掂10月黨慶先，家仲煩緊點樣做得好。