氣旋「天鷹」改名「天鴿」

【明報專訊】殺人唔少嘅颱風「天鷹」，喺2011年12月吹襲菲律賓南部，引發洪災同山泥傾瀉，令超過2300人死亡或失蹤，仲有2000人受傷，颱風委員會唔想勾起災民嘅傷心事，今年1月底決定用「天鴿」取代「天鷹」，作為新嘅風暴名稱。


免勾菲國災民傷心事

香港天文台總學術主任呂永康話，西北太平洋及南海一帶，包括日本、韓國、菲律賓、香港夾埋14個地區，一共有140個熱帶氣旋嘅名稱，而呢一帶每年大約有30個熱帶氣旋，所以最快4至5年就要重用。呂永康話過去有唔少颱風造成嚴重人命傷亡同經濟損失，呢啲受影響嘅地區可以建議取消相關嘅熱帶氣旋名。


港一帶地區 140個名

每個熱帶氣旋名稱都有唔同意思，而新增嘅「天鴿」係由日本提出嘅星座名。香港亦都有提供「啟德」、「獅子山」等10個名。