茂波金句太太家人熱爆

【明報專訊】發展局長陳茂波被揭發家人持有新界東北發展區內地皮，事件幾日以來不停發酵，令網民剝到一地花生之餘，亦令惡搞圖如雨後春筍咁湧現。


威廉叫「My son」 陳叫「太太家人」

噚日《蘋果日報》揭發持有土地嘅其中一間海外公司Orient Express 係陳嘅「太太許步明及其家人」持有，而「其家人」就係佢個仔陳天行，有網民就將佢一家三口張相（陳家仲有一女），同英國威廉王子與老婆凱特啱啱生嘅王室BB仔比較，話外國父親叫個仔係「My son」，我哋父親就叫「我太太的家人」，雖然類比未必正確，但Emily睇到亦笑咗！

公民黨叫市民星期日上街

泛民政黨喺呢件事上亦「不遺餘力」，其中今年年宵賣過「鬥快落台魚蝦蟹」遊戲嘅民主黨，噚日就講到明對陳茂波「封盤」，即係話佢落台賠率爆燈。公民黨就話佢一年以來，家人被指經營劏房，又畀人話酒後駕駛，加埋涉囤地，瀨咗三鑊甘嘅，叫市民今個星期日齊齊上街踢佢走喎。