高過香港 巨鴨12月訪基隆

【明報專訊】仲記得兩個月前黃色巨鴨訪港風靡一時、將尖沙嘴擠得水泄不通嗎？當大家以為巨鴨熱潮已經完結，估唔到佢已再有下一站。繼北京早前宣布9月展出巨鴨後，台灣基隆噚日宣布12月中起一連6星期會展出高18米嘅巨鴨，展期比香港多兩星期，鴨仔高度更比香港嘅黃鴨高1.5米。


Emily以為各大城市只鍾意鬥摩廈高度，原來小至一隻膠鴨都要鬥一餐。仲記得巨鴨訪港公布時，主辦單位話「港鴨」係全世界現存最大嘅鴨，但紀錄只保持6個月就會被打破，年尾基隆就會有一隻高18米嘅巨鴨，比16.5米高嘅香港鴨高成1.5米，將成為新嘅「世界最大鴨」。


明星巨鴨先喺9月於美國匹茲堡同北京展出，但體型細過香港嗰隻，到12月去到台灣先「長高」，鴨粉記得買定機票嘞！