「四五十歲無物業係廢人」

【明報專訊】噚日立法會諮詢市民對新界東北計劃嘅意見，有唔少「鄉親父老」出席，有支持亦有反對計劃。輪到侯志強發言，無錯，就係果位話只要政府賠足錢，祠堂都可以拆嘅上水區鄉委會主席。佢一開波話支持新界東北發展，同情呢排捲入囤地漩渦嘅發展局長陳茂波嘅遭遇，可能肉緊得滯，侯志強語出驚人咁話﹕「陳局長我覺得你太保守，申報咗咪得囉，使乜曬晒副身家出嚟畀人睇……一個人到咗四五十歲，咩物業都無，又無地，係一個廢人，仲做咩局長？」


陳偉業投訴侮辱無地無樓嘅人

侯志強嘅豪語隨即引起議員起哄，人民力量陳偉業即時投訴，話覺得侯志強呢句話侮辱香港無地無樓嘅人，要求主持會議嘅主席謝偉銓裁決，工黨張超雄亦加把嘴﹕「我56歲，無擁有土地，我覺得被冒犯。」謝偉銓本來想簡單了事，畀下一個代表發言，但係群情洶湧，最後佢要休會5分鐘詢問法律顧問意見，最後佢話因為公眾人士嘅發言唔受特權條例保護，最終無做裁決。意下之意，任何人認為侯志強言論有冒犯，可自行追究。


群情洶湧 要休會5分鐘

會議中段休息，侯志強離開，陳偉業仍然窮追，走出去搭住對方膊頭，要求佢道歉，侯志強無乜理佢，仲話如果啲人咁叻咪買層樓、買幅地囉。