環團罵中電「龜縮」

【明報專訊】中電年多之前搞咗個叫做「中電綠適天地」facebook專頁，原意係想推廣環保信息，環保團體當然利用呢個渠道表達意見，綠色和平上個月呼籲網民到呢個專頁留言，要求中電訂立1%節能目標，最終有300幾個網民響應，點知啲留言喺7月3日畀中電「河蟹」咗，網民喺專頁睇唔番留言。


中電﹕fb改版可留言

綠色和平10個成員噚日帶埋300幾個烏龜氣球去中電總部，抗議中電態度「龜縮」，要求中電一星期內答應同環團見面，如果唔係就會將行動升級。綠色和平資深項目主任古偉牧話，中電改咗專頁設定，令網友嘅留言只係中電睇到，其他人睇唔到，信息「河蟹」晒！


被指「河蟹」留言，中電話近期佢哋嘅fb專頁改咗版，目的係為咗方便網民瀏覽資訊，網民家仍然可以留「comment」表達意見，全部comment留言都會公開。