惡搞茂波不斷 網民擺秦檜上枱

【明報專訊】兩日網民不遺餘力咁惡搞發展局長陳茂波，繼「我太太及其家人」被惡搞之後，噚日又見到唔少新作。其中陳茂波同太太許步明變咗做電影主角。唔單止咁呀，今次啲網民連宋朝嘅秦檜都擺埋上枱。


變「聽拉者」海報主角

有網民將「聽風者」嘅電影海報惡搞做「聽拉者」（圖1），主角就由梁朝偉同周迅變咗做陳茂波同許步明。連特首梁振英同行會成員羅范椒芬都齊齊亮相，不過佢兩個嘅樣就暗咗啲，要落足眼力先睇到。


秦檜妻﹕感到不安

facebook又瘋傳一份《臨安時報》（圖2），內容喺講秦檜捲入「莫須有」風波之後，佢老婆王氏點樣發聲明回應，話自己對社會及朝廷為佢曾經獻計殺岳飛鬧得沸沸揚揚，感到不安喎。最重要嘅喺份《時報》講埋啲平民點整「油炸檜」。呢啲惡搞之作，真喺幾得意。