沈祖堯解清真風波﹕要包容

【明報專訊】中大校長沈祖堯之前收到穆斯林學生來信，要求中大開清真餐廳，佢承諾一年內實現，呢件事嘅迴響都幾大吓。沈校長噚日喺網誌話，網上大多數人都認同中大要提供清真食物，但都有人質疑，「點解唔提供佛教素食或者猶太教潔食」？更加有人諷刺話：「如果我到回教國家讀書，佢哋係咪會提供燒豬畀我過農曆年？」


Emily做咗少少資料蒐集，原來穆斯林唔可以食肉食性嘅動物，同埋未經儀式宰殺嘅動物，教徒食錯嘢要禱告懺悔，嚴重嘅更加要洗胃。猶太教亦限制咗可以食嘅動物種類，同埋屠宰烹調方式。


咁沈校長點回應外界對清真餐廳既質疑呢？沈校長話，記得SARS期間，多倫多有人話疫症係唐人街居民散播嘅，令中國人好難過。香港人以少數族群身分喺國外生活，需要其他人包容同接納，反過來，外地人嚟香港，我哋亦應該接納佢哋。


外地人嚟香港 應該接納佢哋

沈校長仲話，當我哋用尊重、愛心同公平態度對待唔同嘅人，就會睇到佢哋以相同方式對待我哋。睇嚟，喺沈校長心目中，呢間清真餐廳嘅存在意義，絕對唔止照顧穆斯林同學嘅飲食，更加要傳遞一種價值觀；Emily覺得，近年中港矛盾嚴重，呢個道理睇嚟都用得着。