女教師急道歉補鑊

【明報專訊】網上近日瘋傳一個女教師講粗口片段，事發響旺角街頭，話說嗰日建制派團體用大橫額遮擋法輪功攤位，呢個女人唔滿意警方處理手法，於是同警察嘈起上嚟，點知佢愈講愈激動，仲講埋英文粗口。呢條片畀人放上facebook專頁，佢好快就畀人「起底」，原來佢姓林，響寳血會培靈小學教書。


有網民發起「一人一電郵撐前線警員」，去信呢間小學要求處分佢。噚日響相關facebook專頁度，已經有2.6萬人「讚好」呢段片，學校同姓林嘅女教師都咪話壓力唔大，結果佢哋先後喺學校網頁發出聲明「補鑊」。


第一個係女教師寫嘅，佢話同意嗰啲用語唔恰當，會以此為誡，以後喺任何場合都唔會再犯，真誠致歉。之後學校校長亦發聲明，話對事件深感遺憾，但既然老師已經道歉，希望社會人士諒解，又提醒家長要留意子女情緒，若有問題，學校會協助。