忌廉哥開咪 「喵聲」打招呼

【明報專訊】肥貓「尖東忌廉哥」嘅大名相信多數香港人都聽過，噚日佢仲去咗商台《在晴朗的一天出發》做嘉賓，冲一冲日日唔停講陳茂波嘅悶氣。微服出巡嘅忌廉哥戴住紅色煲呔，晨早一去到商台，已經畀一眾粉絲圍住影相，連商台行政總裁陳志雲都嚟一睹佢嘅風采。開咪之後，忌廉哥仲「喵」一聲同聽眾打招呼，搞到大家鬼咁開心。不過佢嘅主人高先生話，忌廉哥喺未被佢領養之前，成日畀其他貓友蝦，絕對唔係家咁紅、咁威風。


貓主高先生噚日講起忌廉哥身世，就好似「醜小鴨」一樣，喺繁殖場係唯一一隻忌廉色嘅英國短毛貓，不單止賣唔到錢，畀人領養之後又成日畀同屋嘅貓友蝦，搞到「披頭散髮」，輾轉去到佢喺尖東嘅舖頭，因為之前曾經走失過見報，多咗曝光先有家咁紅，連外國遊客都走嚟探下佢。


下月8歲 舖頭搞派對

高先生覺得忌廉哥對有需要人士可以有好大鼓舞，如果第日有非牟利機構要求合作，忌廉哥都好樂意幫手。全程眼睩睩嘅忌廉哥，原來下個月5號就到8歲生日，一班粉絲會喺高先生嘅舖頭搞生日派對，但原來佢好唔鍾意畀人抱，就連大家以為佢同聽眾打招呼嘅「喵」一聲，其實都係向主人投訴。