侯志强：點解咁多盲毛譴責我？

【明報專訊】上水鄉事委員會主席侯志強力撐捲入囤地醜聞嘅發展局長陳茂波，仲爆出「如果一個人到咗40、50歲，一啲物業都冇，呢個係廢人」嘅講話，噚日侯志強先後喺兩個電台解畫，話呢番言論並無冒犯所有港人，重點係討論乜嘢人適合做局長。佢話，若果一個人到40、50歲，身無分文，事業物業皆無，「如果搵呢啲人做局長，等同搵個廢人」。侯志強仲話﹕「我都唔明點解咁多盲毛走嚟譴責我。唔緊要，我日日坐喺鄉事會等佢嚟，有咩嚟同我講。」


劉江華申報無地無樓 侯：佢唔話畀你知啫

佢話，力撐陳茂波係因為支持發展新界東北，呼籲陳茂波唔好辭職，即使陳擁有土地，但只要有申報就冇問題，出任局長亦毋須「變賣家當」出售所有財產。被問到政制及內地事務局副局長劉江華申報亦係無地無樓，侯志強就話「佢唔話畀你知啫！」


侯志強話，日前呢番言論係勉勵年輕人努力工作，唔好「少壯不努力，老大徒傷悲」。被問到佢一出世就有「丁權」，係咪唔公平，侯話佢係靠自己打拼，先有今日嘅資產，唔係靠父母咁話。